2009年4月30日星期四

股神夢(轉)

股神夢 <一>


看到馬沙講全職炒股, 一時感觸, 等我都講下我悲痛既全職炒股歷史, 係咪發人深醒就唔知, 不過都希望通過我既仆街經驗可以比到大家一d啟發.


我既股神夢係由我打第一份工開始, 果時剛剛我打工果間公司就搞上市, 有個上司就走過黎同我講, 話公司可以比我通過內部認購返一手, 問我有冇興趣, 如果冇, 不如用$2,000賣左個認購權比佢, 果時我完全唔知股票係咩野, 只係係電視睇過”大時代”既方展博對住交易所大叫升, 升, 升咁就發左, 見咩都唔洗做就搵到$2,000, 當然第一時間賣左佢, 這是我人生第一次利用股票賺到錢, 當時我覺得幾開心. (後來當然發現自己比人昆左,果個pk上司原來同唔少同事買左認購權, 上市後一手最少都執左一萬銀)
自此之後, 我見炒股票仲好過打工, 加上自己學歷低, 經驗少, 打工就實永冇前途, 希望自己有朝一日可以成為股市中一條大鱷.(點知最後都係做左點心至真) 於是就日日去書局搵d投資書籍日睇夜睇, 由如何投資股票睇到西人寫既投資書籍都唔放過, 最後仲番夜校學埋會計, 等我可以識睇上市公司年報.(不過好幸運地發現學左會計, 原來對我投資成績一d用處都冇, 反而對我之後創業極有幫助)


之後幾年, 我仍然一路打工一路炒股, 投資成績有嬴有輸, 但投資經驗都比初期好左好多. 有一次,看過美國股神畢非德既自傳 Buffett: The Making of an American Capitalist, 當時佢老人家係香港都未係好hit, 睇到佢原來係廿幾歲就自己開投資公司, 首先叫家人支持自己, 之後投資開始見成績, 就慢慢收其他客, 直至佢老人家解散佢間投資公司, 佢已經係億萬富翁, 果時佢都只不過係三十幾歲. 就係咁就出事, 對當時我這位全身都係熱血既青年完全視佢老人家為畢生偶像, 立志要學佢咁開投資公司, 之後開班授徒, 成為股神. 加上當時又比我符符碌碌係幾次炒作中, 又搵到多少, 令我對投資技巧既自信心強化唔少, 這時就係種下我決定之後全職炒股既仆街之路既開始. (所以其實好多時d偉人自傳, 真係害q死唔少後生仔)


股神夢 <二>


今日係信報睇到錢志健講到心雄比貪心更難處理, 真係講得好岩, 想當年全職炒股會仆街正正就係死係這種心態. 我既腦袋又諗起當時有幾仆街…..


係受到股神既自傳無意中鼓勵下, 我當然要計畫點樣係股市搵大錢既夢想. (如果畢佬知道有條傻仔, 因為睇到佢本自傳就走去全職炒股, 相信一定會心諗”死傻仔, 自傳既野都好信, 如果唔係有個證券分析之父做我師父, 我讀書果時免費走去同佢做打雜跟佢學野, 順手識埋佢d客, 加上我屋企有d家底支持下我, 你估我間投資公司邊有開得咁順利, 當然最重要係我係投資天才先至可以做到股神, 你睇下我班同門師兄弟, 最掂果個鄧佬, 身家都重差我幾皮, 就知我有幾勁, 你個死傻仔唔好發夢, 想學我”)


當時我打工收入都得果幾千銀一個月, 這幾年有時好運上黎, 一個月既炒股收入仲多過打工, 加上覺得當時返工既際遇真係麻麻地, (緊係麻麻地, 果時我份份工都係交左差就算數, 邊有運行) 同上司關係又唔係咁好, 就心諗不如唔好做, 全職炒股, 但問題係炒股最重要有資本, 雖然我累積到少少資本, 但都唔係好多, 於是我做左一件好仆街同埋令我之後好後悔既事, 就係問我屋企人借股本. (大家都可以想像得到, 之後有幾大獲) 結果加加埋都有幾十萬就開始左我既仆街之路.


我辭工既時候正好係 1998 年…..


待續……


(唉, 我都想打多d, 不過我手速成輸入法真係好弱, 如渣估兄所講, 真係重新練過, 不過係咪宜家練簡體會著數d ? 下次會講到我既投資技巧, 除左股神既書, 仲有源自邊幾本書, 有機會大家交流下)


股神夢 <三>


辭工後, 開始左我既仆街之路, 其實全職炒股既日子真係好 free, 根本同退休冇咩分別.


試想想當時我一日就係咁樣過, 朝早8點幾起身, 食早餐, 睇報紙, 之後上網睇新聞, 開即時報價等開市, 留意股市走勢, 上午收市. 食完 lunch , 下午開市後, 就係度對住部電腦發呆, 睇住d跳來跳去既股價直到收市. 四點幾見有時間就走去圖書館睇上市公司年報, (當時d年報都仲未可以係網上睇, 上網真係最偉大既發明) 睇到差唔多就返屋企. 比起之前返工簡直係天堂與地獄, 全程冇人理你做咩, 冇你覺得討厭既上司係度管住曬, 對當時既我係要咁free既人生先覺得有意義. (最後我回想咁既生活同做個廢人都冇咩分別, 人生時間有限, 其實可以做更加多有意義既事, 特別係我之後明白股市玩既都只不過係財富轉移既遊戲, 當然這只不過係我既個人想法.)


在最初開始全職炒股, 我既投資組合 (投機??) 係以二線股為主, 當時我這投資手法好大程度係參考自 The Intelligent Investor by Benjamin Graham (即股神師父) 與及當時從史威德(即林行止先生另一筆名)既書中介紹到英國經濟學家凱恩斯係投資上既生平, 其put all eggs on one basket 既手法令我把投資組合集中在少數股票身上, 只不過由幾隻股票組成. 當時我正處於98年上半年, 其實當時有唔少二線股跌到好低既價錢, 好多股票都從低價買入. (不過係政府入市前,原來低處未算低)


人一生中有三種心態係最容易出事, 一係心雄, 二係心急, 三係空閒. 係我全職炒股既日子就正正有齊曬這三種心態. 如是者過了幾個月, 我見我既投資組合所賺的利潤唔係好多, 加上這些日子沒返工收入, 日常支出都一樣要照比, 好彩當時我冇女朋友, 加上又可以食屋企, 都仲可以頂得住, 不過少數怕長計, 我就開始覺得利用股票賺錢好慢, 以我既本事有咩可能仲未發達, (真係有咩人唔係咁諗)就開始研究點炒恆指期貨.


不過在研究過後, 發現玩期指風險太大, 怕出事既時候, 自己會好大獲. (雖然我好貪心, 但都有小心既一面) 但如果玩恆指期權就風險細好多, 最多都係輸曬d期權金, (就係咁諗就出事) 於是我把我投資組合中有利潤既股票沽出, 套現約20%本錢, 準備轉到炒恆指期權. (好明顯大家都會估到, 最終我係仆街係恆指期權手上)


當時我睇住恆指由11,000點係咁跌到9,000點…


待續….


股神夢 <四>


係未講我點仆街法, 我想講下睇投資書既經驗.


因為全職炒股既關係, 我平時都好得閑, 一有時間就睇書. 我曾經睇過唔少關於大炒家既理論及自傳, 其中有一本書, 我好鬼印象深刻. 就是索羅斯果本大作 The Alchemy of Finance, 本野係我睇過咁多本既投資理論書, 唯一一本係我點睇都係一知半解既投資書, 佢老哥講既反射理論有如金庸小說中既倒練九陰真經一樣, 唔係普通人可以睇得明. 果段期間我真係花左唔少時間去讀, 仲讀到差d走火入魔, 唔怪之d人話讀哲學既人唔係天才就係白痴. (當然可能有其他人可以係其中悟出絕世奇功)


另外有一本奇書叫做 Reminiscences of a stock operator by Edwin Lefevre, 係講述一百年前大炒家 Jesse Livermore 既炒股事績. 我大部份投機炒股既方法都係從這本奇書身上學到. 誠意推介比各位希望係股市有一番作為既朋友, 絕對係縱橫股市, 必備良書. 當時本書日日比我睇到差唔多爛, 其中所講既炒股實戰理論, 直到現在我仍記在心中. 特別有一段講佢做左少年股神都唔夠一年, 就炒棉花輸q曬d錢, 結果仲欠人周身債, 之後足足衰左幾年, 最後又比佢炒股翻到身, 其中講佢既經歷同心態上既轉變, 我宜家都仍然記憶猶新.


講完投資書, 係時候講番我條仆街之路.


上帝要你仆街, 必先令你瘋狂. 自從我決定炒恆指期權後, 就日日留意住恆指既走勢, 我唔知係好運定係行衰運, 當時香港就咁岩遇上金融風暴, 恆指就由11,000點係咁跌, 我就一直係度諗點炒好. 首先我認為當時恆指大方向既走勢一定係跌, 我就係約9,000點開始買恆指put期權, 結果唔洗幾日, 我就賺到等於我之前返工超過一年工資既金額, 可以想像得到當時我係有幾 high, 心諗以前同人打工果時, 做到成隻狗咁, 仲要日日比人問候, 一個月都係得果幾千銀, 宜家只係一日就搵到相對之前一年既人工, 比我炒多幾個月, 容咩易做到千萬富翁. (直到現在我都唔想承認當時既我係short左)


之後就由9,000點一路買put買到7,000點, 越係賺到錢, 越係心雄越係瘋狂, 我見炒股票都冇炒期權咁好搵, 再把股票組合中, 再沽出大約一半股票出黎, (多年後回想,沽出當時手上股票投資組合這決定,可列入我人生十大白痴行為之首, 點解? 之後再解釋) 其中資金轉去炒期權. 當恆指跌破7,000點既時候, 雖然我已經 high到傻左, 但仍然有些少理智, 我好似好聰明咁認為恆指一定會反彈, 結果我係恆指6,800點時, 反手轉買恆指 call 期權, 雖然之後恆指下跌到6,600點, 我都冇沽出手上 call 期權, 仍然一路keep住買call 期權, 結果恆指真係反彈到7,200點, 我賣清手上 call 期權, 又再度故技重施反手買 put 期權, 仲要係好大手咁買, 心諗如果搞掂埋哩次就發達.


但當日股市收市後, 突然間係電視機睇到話有特別廣播, 有三條友口黑面黑, 好似比人殺左老豆咁走出黎開記者招待會…..
這時是我仆街既開始….


待續…….


股神夢 <五>


當我係電視機見到未來特首係度話, 宜家官府決定入市打大鱷, 當時第一時間心諗:” 仆街 !! 點解官府會入市 ??? 冇可能 !! 香港唔係一直都實行積極不干預政策, 教科書都係咁講, 唔通索攞絲條靚好串咁係電視話聯匯一定會脫勾, 搞到官府要入市, 頂 !! 我仲大手買 put 期權, 點算好 ?? 今次真係殺錯良民 ”


(事後為左這個”教訓”, 我唔想自己死得不明不白, 我追查當時官府入市既資料, 除左發現官府果邊有高人指點外, 如果唔係都唔會入市時機計得咁準, 還有就係發現所有有份幫官府入貨既大行, 一早就收到風, 既然大行都可以收到, 當然索攞絲等大鱷都收到, 當我係6,600點買 call 期權仲以為自己好醒果時, 點知原來各大鱷已經著手平淡倉, 同埋準備反手做好倉, 就係咁樣, 我先買中… 最後發現原來咩反射理論都係假, 收風快先至係王道, 唉! 等我之前仲係咁買佢咁多書返黎睇, 真係浪費金錢)


係官府入市第一日, 我係屋企部電腦睇到百年難得一見既情況, 好有”大時代” feel, 所有藍籌股既買盤都係守係一個價位, 當時我既心情好複雜, 我好開心能夠睇到咁壯觀既場面, 但入場費對我黎講真係好貴, 唔單只好貴, 係好x貴, 係以我所有 put 期權都變成廢紙做代價. 我用左一個月時間炒期權賺番黎所有錢, 結果係一日就輸番曬落去, 仲要連本金都輸左兩成. (回想如果當時我唔係咁黑仔, 果次係比我嬴左既話, 我相信以我少年輕狂既性格, 係之後一定好有可能會破產收場, 這場挫折可能係不幸中之大幸.)


雖然當時我遇上大挫敗, 但我都未灰心, 仍然希望可以利用餘下既資金, 賺番之前所失去既錢, 咁就埋下我把餘下資本都輸埋既伏線. 係投資(投機 ?)上, 其實好講”平常心”這東西, 平常心係對所有事物既分析力既本源. 當一個賭徒係賭場輸左大錢之後, 通常都會希望能夠利用餘下既錢去嬴番之前所失去既錢, 結果就只有把連手上少少既錢都輸埋, 因為佢已經失去平常心, 佢只係用一個不切實際既願望去主宰佢既行動, 而唔係用理性既態度去主宰佢既行動. 其實大炒家 Jesse livermore 係佢本奇書, 都提過這種心理壯態, 佢自己都試過好幾次係咁既心理壯態下輸大錢, 當時我日讀夜讀佢本書, 雖然明白這道理, 但係臨場既時候都係一樣控制唔到我自己, 可見要投資發達唔係一件容易既事. (當然有其他大炒家睇到我咁寫, 就會心諗係你廢姐, 又唔見我係咁, 死傻仔)


幾個月後, 失去平常心既我, 結果….


待續……


股神夢醒


在官府入市之後幾個月內, 我仍死心不惜希望可以把輸左既錢嬴番黎, 結果我把手上股票投資組合不斷地沽出 (本來我最初原意是長線投資), 把資金轉到去炒恆指期權. 結果好快咁係幾次估錯恆指方向下, 輸到得番本金約四成. 到左果陣, 我開始覺得驚, 原因唔係因為炒賣輸錢覺得驚, 我當時好天真咁覺得這些錢輸左, 咪當買個經驗, 我仲有一日一定可以搵得番, (之後實情係我衰左好耐, 先等到果一日, 當時我完全唔明白有些機會冇左, 就真係可以一世都搵唔番, 所以宜家我做生意時, 好珍惜所有賺錢既機會) 但我宜家輸既錢大部份都係同屋企人借, 這一點令我覺得好後悔, 唔知點面對屋企人.


結果有一日, 我既心情好 down 咁同我老豆講炒期權輸錢這單野.點知我老豆用家長式口吻同我講 : “衰仔, 一早知你會死硬, 年少氣盛, 以為自己識少少就好醒, 係我借錢比你果日, 就知你會有今日” 當我聽完我老豆咁講, 即場謝曬, 不過我老豆見我死曬狗個樣, 就唔忍心地安慰我 :”算拉! 衰仔, d錢輸左當買個教訓, 下次醒目d” 果刻我完全感受到父愛既偉大, 我好感激上天安排一個咁好既老豆比我.


既然全職炒股衰左, 就只有面對現實. 當時我就把手上餘下股票係有少少利潤情況下沽出, 先把錢還比屋企, 但都係唔夠, 之後再諗辦法一路路還返比屋企. 但當時其實我都迷茫, 如果我唔炒股票, 就好似咩都唔識, 自己都唔知可以做d咩野好, 返出去打工又好似係死路一條. 直至當時有一日, 買左隻”華爾街”既vcd番屋企睇, 這套野真係好精彩, 完全反映拍出金融界既真實既一面, 特別係 Michael Douglas 飾演大炒家 Gordon Gekko , 除左佢果句金句 Greed is good 外, 佢有一段對白令我完全改變我之前對股票市場既睇法.


Gekko: The richest one percent of this country owns half our country’s wealth, five trillion dollars. One third of that comes from hard work, two thirds comes from inheritance, interest on interest accumulating to widows and idiot sons and what I do, stock and real estate speculation. It’s bullshit. You got ninety percent of the American public out there with little or no net worth. I create nothing. I own.


這段對白令我明白原來股票市場只不過是一處被人利用把財富轉移既地方, 本身這地方是完全不存在任何創造價值. 當我明白這道理後, 開始諗炒股票係咪可以成為終身職業 ? 連大炒家 Jesse Livermore 都炒到最後要吞槍自殺, 我係咪都要步佢後塵 ? 最後我醒悟到炒股票真係過唔到世, 開始想做生意. 當時我諗住做生意, 最重要係推銷, 於是我去搵左一份 sales 既工去 train 自己, 就開始左我另一段生涯.


股神夢完.


馬後砲


有一件事其實我一直都冇同任何朋友講, 原來要係股票市場發達係好容易, 宜家我馬後砲講講, 八年前我全職炒股時所買既股票投資組合, 今日我透露其中一隻我當時本來打算長線持有既股票, 佢姓建名滔化工, 果時我從佢份年報睇到間公司果幾年不斷投資開廠, 當時我認為這隻股票股價兩年內一定會大幅上升, 係1.3-1.4入左15萬股, 結果持有到我決定不再全職炒股, 就賣清佢, d錢還番比屋企. 如果當時我唔係炒期權, 而係咩都唔做直到現在, 咁我就發達. 原來 buy and hold 真係可以發達. (不過宜家諗番起個心情, 就好似唔見左張中左六合彩頭獎既飛一樣, 好X心痛)


我公開這個經驗係咪令好多人會改變對炒股既想法 ?

2009年4月28日星期二

廢柴基金四月結

由於本廢柴怕死,88點沽的160C 289點止蝕,轉沽164C 170點,蝕31大點。142點沽的 120p 早已在20點平倉。本月總計蝕55點。

 

本月敗筆,平120p後不沽回高一點的put。(其實有試沽,奈何大市大升,一真沽不到)

 

本月幾乎由頭被挾到尾,轉164c 時,大約15800點左右。以偉哥所言,秘密武器941都已經出動(大升),照計應離頂不遠,但本廢柴認為所有藍籌幾乎已經全部創半年新高,亦無一隻籃籌轉勢向下,再升應該最少164以上,所以還是決定轉倉。以結果論對錯,決定當然是錯,但經歷過舊年10月一役,操作以不輸為大原則,所以無後悔,反而應該再諗是否應轉去170c。

 

本月豬流感,變數太大,不敢沽廢紙權。

 

已沽5月124p @ 120,即蟹 40點,如到126左右會轉低一點。

2009年4月17日星期五

樓市透視眼:專家買連約盤攻略 (From 蘋果日報)

樓市透視眼:專家買連約盤攻略


近期樓市回穩,一手新盤當旺,二手買賣回升,在「磚頭」文化重新抬頭之時,投資者不斷尋找回報可觀的收租物業,為資金謀出路,最近由細價樓以至中上價樓皆接連出現連租約成交,不過,連租約盤向來無樓睇,投資者未睇先買,始終存在一定風險,故今期特別找來經驗豐富的業內人士教買連租約盤貼士。
樓價超跌越來越多人買「磚頭」


「買樓收租,永遠都要夠穩陣,夠大路,鐵路沿線屋苑一定係首選,想平可以買嘉湖山莊,出中環快過馬鞍山。今次樓市小陽春十分旺,金融海嘯後,好多人都認為實物始終好過金融投資產品,股票一跌就唔見咗一大截,層樓最多都係跌兩、三成,風險相對較低。」中原研究部聯席董事黃良昇分析說,由於樓價超跌,所以吸引越來越多人買樓,個市旺到無吉樓睇,投資者惟有買入連租約單位,尤其是高租金的舊租約更加搶手。另外,美聯物業首席分析師劉嘉輝認為,銀行存款利息近乎零,在雷曼事件的陰影下,已驅使不少投資者改為買樓收租,加上目前樓市喘定,樓價回穩,再度刺激投資者入市,最近以租金回報有4、5厘的連租約單位成交較多。


中原趙鴻運指出,通常買連約盤的都是投資經驗豐富的人士,他們只看圖則及價位便可入市。


【攻略】


向管理處查詢漏水問題


「買樓無樓睇,最怕就係買到漏水樓,買家雖未能入屋查看,但可向管理處查詢滲漏問題。」中原地產首席分區營業經理趙鴻運指出,如單位有滲漏情況,有可能牽涉到樓下和樓上單位,買家只要向管理處查詢樓下和樓上有沒有投訴過漏水問題,便可知到單位內部是否有滲水。另外,買家亦可直接走到樓上或樓下單位詢問。


要求業主出示租客交租記錄


由於連約單位租客並非買家自己所選,最擔心遇上租霸欠租,故買家在簽訂臨時合約前,一定要業主出示租客近6個月的交租記錄,以防業主隱瞞租客欠租問題,通常業主都肯合作。


教買鐵約單位


買家如能買入連鐵約單位,則為較理想的物業投資。何謂鐵約?趙鴻運稱,以太古城為例,若現有單位租客為日本人或韓國人,便可視為鐵約,因為日本人或韓國人居住一般約2年,而且每月還有一定金額的公司房屋津貼,買家至少不用擔心欠租問題,加上他們對居住有要求,本身亦愛整潔,所居住的單位內櫳必須企理,廚房、浴室更要求新淨,所以買入這類單位大可放心

單憑大門新淨程度,可估計內櫳質素。


見「門」知著


所謂見「門」知著,即使無樓睇,亦可從大門新舊情況,推測單位內櫳是否經過翻新。趙鴻運教路,如所見的是廿多年的原裝大門,則可推算單位內部可能廿多年並無翻新裝修,買家要有心理準備,所買的有可能是「殘、爛、散」,相反,若大門越是簇新,兼款式越是新穎,則內櫳有很大機會曾作出翻新。


要求長交吉期乘機摸番轉


在購入連約盤時,可要求業主給予較長交吉期,合理要求最長為4個月,由於業主仍然有租收,一般都願意接受,而買家則可趁這4個月期間,博樓市升勢乘機摸番轉,若未能成功摸出,仍可如期交易,即買即收租。

轉移按金


趙鴻運教路,不少買家在買入連約單位時,都忘記向業主取回租客已交付的2個月按金,建議買家在成交日當天,要求業主經律師樓,一併將2個月按金轉移到買家戶口,否則日後租約期滿,租客追收按金時,買家便要自行交回2個月按金給租客,蒙受金錢損失。

收租物業不需要買頂級貨,較平宜的次級貨同樣可享高回報。


平價無景一樣高回報


買樓收租始終有別於自住單位,趙鴻運指出,即使平價無景單位,亦同樣可享高回報,次級貨與優質單位,其租金差距不會太大,租客反而會較注意內櫳保養是否良好。

找機會睇樓


「在簽訂臨時合約後,買家可嘗試要求業主安排睇樓,曾有買家成功假扮裝修工人,與業主一同查看單位。」趙鴻運稱,例如剛剛遇到租客要求業主維修單位,買家可抓緊機會與業主一同前往睇樓。

【利】


即買即收租坐享高回報


現時不少屋苑平均租金回報約有4厘多,比起銀行存款利息高,對於投資者甚具吸引力,由於近日樓市暢旺,吉樓盤源欠缺,投資者已急不及待,買入連約盤收租,最大好處是可即買即收租,馬上坐享高回報。

慳半個月佣金

買入連約盤,即連租約一併購買,可節省半個月經紀佣金,而且還可以省回單位裝修費、添置傢俬電器費用、尋找租客時間,避免丟空期出現,以及省回免租期內的金錢損失等。另外,由於單位已有租客租住,上手業主已代為篩選租客,省卻不少揀租客的功夫。

連約盤平市價5至8%

由於連約盤十間有九間都無樓睇,僅極少數例外,故連約盤通常都會較市價平5至8%,買家可乘機向業主大力壓價,業主一般都會接受現實乖乖就範。

進可攻退可守待升市財息兼收

購買連約盤,尤其是回報穩健的大型屋苑,可謂進可攻、退可守,為目前抗低息、抗通脹的投資工具,若後市走勢未明朗,仍可一邊收租,一邊等待樓價升值,反正收租夠供樓,當樓市大升時,則可連租約一併賣掉,盡享財息兼收。

投資物業可按七成

最近銀行放水,推出五花八門優惠搶客,最近更惠及連租約的投資物業,由早前一般只批五成按揭,放寬至七成,解決投資物業按揭不足的問題。

【弊】

可能支付巨額維修費

雖然買入連約盤擁有上述不少優點,但由於始終無樓睇,單位內櫳如有滲漏、喉管淤塞等問題,便需自行負責維修,假若遇上嚴重的結構性問題,更要花費巨額維修費,招來損失。

租客無得揀租約條文不能改

由於租客是上手業主所選,租客究竟是甚麼人,只能靠上手業主描述,買家需留意有關風險。另外,上手業主與租客所簽訂的租約,內容所有條文亦無法更改,買家只可全部接受。

2009年4月6日星期一

地產部落:低層單位十宗罪 (from 蘋果日報)

買樓買高層係普遍人搵樓要求,除天然光多、景觀開揚之外,有時仲可以避開路面噪音。不過,網友馬田就睇一個低層單位,仲要係全幢樓最低層,因為下面兩層已經係停車場,跟住就係地下入口。難得搵心水樓,但佢又忐忑不安,究竟買唔買好呢?結果走上《親子王國》問大家意見。
體驗最深莫過於ac321,佢以前同父母住5樓,感覺好差,並列舉8大缺點:


1.空氣差,無乜風;
2.陽光少,比較暗;
3.多噪音,特別半夜,連的士大佬講都聽到;
4.就算隔個花園、再隔一條街停車場,晚晚都聽到車alarm響;
5.低層牆身厚,內櫳細;
6.朝早返工時間,電梯經常爆滿,要等下一部;
7.夏天樓上冷氣機滴水,但樓上太多層,唔知邊個單位滴,無得投訴;
8.基於第7點,衫褲永遠唔敢放曬衣架。


唔好以為8大缺點好多,網友Furbymao仲有補充,佢話低層少人鍾意,日後換樓難賣得好價。魚生更指出,「同一座樓,同一單位,二樓同二十樓相差20萬。」牛咪咪附和,話貴20萬都情願買高層,因為住低層,樓上咁多層污水沖落,水渠喉管易有問題,仲話有朋友試過大廈洗完水箱後,滲水入屋。


易爆渠買定家居保險


的而且確,大廈舊,喉管易老化,低層單位最受影響,外牆爆水管搞到污水倒灌滲入屋最大劑;如果真係住呢類樓,買定家居保險先係上策。
不過,ac321話,低層戶都有一個好處,就係發生天災人禍,走得快。


其實,從另一個角度去諗,低層戶勝在價平,若向內園,視野水平適中,景觀較高層更好,所以亦有網友持正面意見。如cf1205亦曾經住5樓,家搬高住8樓,都係望園景,覺得景靚價平,好理想咁話。


另外,conniechan1975同Mrs.Fong唱雙簧咁話鍾意住低層,尤其地下連花園單位喎。不過,呢類已經算係特色戶,同一般低層單位定義,有好大出入。

2009年4月2日星期四

中央結算持股統計 - 3月

統計日期: 2009年3月29日

 

大股東持股在中央結算系統

 

CCASS p1  CCASS p2 CCASS p3 CCASS p4 CCASS p5

 

評論:正經既股可能少於20隻(主要是無大股東的股票及3xxx),本廢柴有維達,點L算?

 

大股東持股集中

 

centralized

 

評論:剩係知道貨應該好疏,炒上炒落好方便,人和商業同99都可以留意。

 

五大持貨集中(街貨)

 

centralized5

 

評論: 貨源歸邊,未炒上既要留意。

 

金利豐,天發,結好,中南總持股多於20%

 

Thousand_stock

 

評論:想發達或破產都在此中尋。

 

最多投資者戶口參與者

 

smallinvestlove

 

評論: 頭十位有8位都是港人的愛股 。中鐵應該是白票IPO造成。電盈就.........

你話點相信無種票呢?

 

最少市場中介者數目

 

smallleastlike

 

評論: 一如所料創業版佔多數。834就比較奇怪。 由於大股東持股在中央結算系統,要少心8115及3344。不過斷估無人會買呢d股掛?

2009年4月1日星期三

中央結算持股統計 - 定義

本統計乃根據David Webb的數花網頁以Excel的Web Query製成。由於種種問題,統計數據絕對會跟David Webb的數據有偏差,而David Webb的數據亦有可能跟港交所的數據有偏差。請不要根據本統計作為買賣股票的唯一考慮。

 

不在中央結算系統參與者總持股量 - 未存倉至市場中介者(證券行/銀行)及投資者戶口的股票的百分比,一般代表原始(大)股東的持股。如果大股東股票由證券行持有,可能代表股票已遭抵押(例如1076)。

不願意披露的投資者戶口持有人的持股量  - 存倉在投資者戶口的股口的百分比。

五(十)大持股總數 - 頭五(十)位的市場中介者持股

金利豐,天發,結好,中南 - 本地證券行,有請湯財兄解惑。(湯財兄補充:天發是大劉的,金利豐是朱太、金江/中南是273系,現為279持有。結好/金利豐是澳門幫,專為一批垃圾股融資。)

市場中介者數目 - 持有該股票的市場中介者的數目,即有多少間證券行/銀行持有該股票。

大股東持股在中央結算系統 - 不在中央結算系統參與者總持股量及不願意披露的投資者戶口持有人的持股量 < 總發行股數20%。不包括H股。如果該股的大股東持股量很少或或者沒有大股東(如330,709,變靚d等等),都會包括在此名單內。請人手對比大股東持股量。

大股東持股集中 - 不在中央結算系統參與者總持股量及不願意披露的投資者戶口持有人的持股量 > 總發行股數80%。不包括H股。代表大部份股票為原始(大)股東持有,在市場流通的股票應該很少。照理應該已違反流通量的要求,實在奇怪。

五大持股集中 (街貨) - 五大持股的市場中介者持貨/市場中介者持貨數 > 總發行股數 90% 。代表貨源集中在數個基金或團體,可能是基金愛股或貨源歸邊。

 

已知問題

  • 香港第二板上市的股票,如945, 2888等,數據有問題。
  • H股及回歸A股的股票,本廢柴還未弄清港交所的總發股數是否包括A股或非流通股。暫時觀察應只包括H股,所以大部份的H股都幾乎100%在中央結算系統內,但6行的數據則顯示有相當多的股票不在中央結算系統內。